Henrique Monteagudo, novo presidente da RAG, reclama un pacto social polo galego e achegalo aos mozos

O novo presidente da Real Academia Galega (RAG), Henrique Monteagudo, --tras finalizar o mandato de Víctor F. Freixanes-- comprometeu "continuidade e un novo impulso" á fronte da institución académica. Tamén demandou un pacto social polo galego e considerou necesario novas medidas neste sentido. En particular, para chegar aos mozos avogou por facelo a través doutros medios de comunicación, citando neste sentido as redes sociais.

"A nosa gran preocupación é a situación do idioma, a Academia é unha institución con poucos recursos materiais pero temos ideas e coñecemento e desde ese capital estamos a reclamar medidas en defensa do galego e propondo novas maneiras de abordar o problema". "Pedindo un pacto social pola lingua e a disposición de calquera medida que se dea nesta liña, o galego é de todos e todas, é necesario un novo rumbo", engadiu para incidir en que fan "falta novas ideas e novos impulsos para o idioma". Para iso, apelou a unha RAG "moi en contacto coa sociedade". Tamén insistiu na necesidade de "máis financiamento" ante a situación "precaria" da institución académica neste sentido. "Medios para facer cousas", remarcou para manifestar que "é o momento de lanzar unha fundación proacademia para novos proxectos".

DÉCIMO CUARTO PRESIDENTE

Así o expuxo ante os medios de comunicación despois de que a institución académica celebrase este venres o pleno extraordinario de elección da nova presidencia, na que a súa foi a única candidatura. O décimo cuarto presidente da RAG estará acompañado na comisión executiva por Ana Boullón Agrelo como secretaria; María López-Sández na tesouraría; María Dolores Sánchez Palomino como arquiveira bibliotecaria e Lourenzo Fernández Prieto como vicesecretario. A eleccion foi con 23 votos favorables e dous en branco.

Henrique Monteagudo (Muros, 1959) é catedrático de Filoloxía Galega na Universidade de Santiago de Compostela e conta cun amplo currículo académico internacional, en universidades europeas e americanas. Membro de número da RAG desde 2012, é o coordinador do Seminario de Sociolingüística da institución e exerceu como secretario entre 2013 e 2021, cando asumiu a vicesecretaría, posto que sostivo ata agora.

ACHEGAS

Doutor pola USC coa tese 'Ideas e debates sobre a lingua (1916-1936). Afonso D. R. Castelao e a tradición galeguista' (distinguida ademais co premio extraordinario de doutoramento), a sociolingüística e os estudos sobre a normalización do galego ocuparon gran parte do seu labor desde principios dos anos 80. Entre outros títulos, destacan 'Historia social da lingua galega (1999)', recoñecido co Premio Losada Diéguez de Investigación, 'O idioma galego baixo ou franquismo: da resistencia á normalización (2021)' ou o seu discurso de ingreso na RAG, 'Facer país co idioma: sentido da normalización lingüística'.

Destacan tamén que como sociolingüista dirixiu tamén diversas contribucións sobre a evolución do galego desde as últimas décadas do século XX ata a actualidade, parte delas no seo do Seminario de Sociolingüística da RAG. A achega máis recente neste campo é o 'Informe sobre a situación da lingua galega segundo os datos do Instituto Galego de Estatística de 2023', aprobado no pleno da Academia en deciembre de 2024. Outro punto importante da súa carreira foi o estudo de Alfonso Castelao, con edicións da oratoria e dos textos sobre o ideario lingüístico do intelectual rianxeiro, así como a biografía divulgativa 'Castelao. A forxa dun mito (2021)'. É ademais o director da Cátedra Castelao da USC, constituída en 2024.

No campo da literatura, Rosalía de Castro, Otero Pedrayo, Ramón Piñeiro e Carlos Casares, entre outros, son algúns dos grandes nomes das letras galegas aos que analizou, xunto a figuras da lírica medieval como Paio Gómez Chariño, Afonso X O Sabio e o xograr Martin Codax, ao que lle dedicou varias obras. En 2009 recibiu o Premio da Crítica de Galicia, na modalidade de investigación, pola publicación sobre as orixes da escritura en galego na Idade Media con 'Letras primeiras. O foral do Burgo de Caldelas, os primordios da lírica trobadoresca e a emerxencia do galego escrito'.

O vicesecretario da RAG, Henrique Monteagudo | Fonte: MIGUEL GRANDÍO - Arquivo