A Xunta di que triplicou a débeda pública desde 2009 para “non tocar servizos públicos esenciais”
Feijóo asegura que o que fixo o seu goberno foi contabilizar o “buraco” que deixara o bipartito de 2.200 millóns de euros.
Por Galicia Confidencial | Compostela | 09/12/2017 | Actualizada ás 10:00
Como é posible que a débeda pública de Galicia pasara dos 3.923 millóns de 2009 aos 11.591 da actualidade? O presidente da Xunta, Alberto Núñez Feijóo, teno claro: “O único que fixemos –desde que el goberna na Xunta-- é transparentar a débeda que tiña Galicia non contabilizada”. Un “buraco” fiscal, dixo, de 2.200 millóns.
“E senón emitiramos a débeda que emitiramos, automáticamente, tocaría o núcleo dos servicios públicos esenciais; non poderiamos manter os hospitais funcionando, nin as universidades máis baratas e con máis profesores por alumno do Estado”, engadiu.
En todo caso, e a pesar de ter case triplicado a débeda desde que goberna, Núñez Feijóo salientou que, en todo caso, a débeda galega, que se sitúa en máis dun 19% do PIB é un 6% inferior a da media das autonomías. “A débeda que nós herdamos estaba por riba da media das comunidades autónomas. E agora está seis puntos por debaixo, en termos de PIB, do conxunto da media española”, dixo na rolda de prensa posterior ao Consello da Xunta ao ser preguntado por GC.
Ademais, lembrou que o incremento da débeda galega débese o incremente do débeda pública do Estado. “Se me pregunta porque o Reino de España incrementou a súa débeda pública ata chegar ao 99% do PIB é porque non tiña un 6% de déficit público, senón que tiña un 9%”, dixo en alusión ao anterior goberno de Zapatero.
