Detectados 3 novos positivos nunha residencia de maiores
Nos centros de toda Galicia hai xa 22 contaxiados.
Por Europa Press / Redacción | SANTIAGO DE COMPOSTELA | 29/07/2021 | Actualizada ás 12:25
Tres novos positivos por Covid-19 en usuarios dunha residencia de maiores de Fene elevan a 19 os residentes nese centro contaxiados e manteñen en 22 as infeccións activas no conxunto de Galicia en xeriátricos, ao haber tres altas.
Segundo os datos facilitados este xoves polas consellerías de Sanidade e de Política Social, foron detectados tres positivos en usuarios da Residencia Santo Estebo de Perlío de Fene e saen da lista por negativizar tres na Residencia de Campolongo de Pontevedra, que queda sen casos.
Por tanto, as residencias de maiores de Galicia concentran 22 positivos en usuarios, deles 19 na Santo Estebo de Perlío en Fene; dous na Bo Día Magnolio de Vigo e un na Residencia de Val do Dubra (A Coruña).
CENTROS DE DISCAPACIDADE
En canto aos centros de atención á discapacidade rexistraron catro novos positivos no Fogar e Clínica San Rafael de Vigo e saen da lista por negativizar oito usuarios da residencia RGA Valverde de Allariz (Ourense) e un do CAPD de Sarria en Lugo.
Por iso, baixan de 12 a sete os usuarios destes centros contaxiados de Covid-19 na Comunidade galega; deles catro no Fogar e Clínica San Rafael de Vigo; dous na RGA Valverde de Allariz e un no CAPD de Sarria.
