A Inspección detectou en Galicia 3.700 contratos fraudulentos a mulleres

A actuación de Inspección de Traballo levou a converter un total de 3.765 contratos temporais fraudulentos de mulleres en indefinidos no último ano en Galicia. Ademais, 757 traballadoras foron dadas de alta na Seguridade Social, de forma que abandonaron unha situación de emprego irregular.

Diso informou a directora xeral de Relacións Laborais, Elena Mancha, na Comisión de Economía do Parlamento galego. Inspección de Traballo realizou nos últimos 12 meses un total de 164 actuacións de control e plans de igualdade; 120 accións para vixiar a discriminación por razón de sexo en materia laboral; 57 actuacións en relación coa conciliación; 55 sobre discriminación no acceso ao emprego; e 33 de control contra o acoso sexual no traballo.

Así mesmo, Mancha destacou que a Consellería de Promoción do Emprego e Igualdade destina 16 millóns este ano ao fomento da conciliación e a corresponsabilidade, máis do triplo que en 2021. Xunto a isto, Mancha expuxo que o Plan Emprega Muller inclúe preto de 36 millóns de euros para pór en marcha oito programas específicos.

Nesta comisión, a deputada Noa Presas (BNG) alertou que as mulleres están "invisibilizadas nesta nova crise", cun maior impacto da inflación nas "capas máis desfavorecidas da sociedade" e no xénero feminino, que padecen unha brecha salarial de máis de 4.000 euros respecto dos homes.

Presas censura a falta de accións por parte da Xunta ante esta situación, mentres "son responsables de que Galicia teña menos capacidade de resistencia" ao contar cunha taxa inflacionaria maior que a media española. Tamén aproveitou para criticar a visita do rei emérito a Sanxenxo (Pontevedra), que identifica coa "marca España", pois mentres "miles de galegos" sofren as consecuencias da crise: "Hai quen se paga a vidorra cos nosos impostos".

A directora xeral de Relacións Laborais, Elena Mancha,. CAPTURA | Fonte: Europa Press