Se es estudante e nos sabes que facer no futuro tes que ir a esta feira en Pontevedra

Este mércores botou a andar no Recinto Feiral de Pontevedra 'Edugal', o XI Salón de Educación e Formación de Galicia, organizado pola Asociación de Empresarios da Mediana e Pequena Empresa (Aempe).

A edición deste ano conta con 65 expositores que axudarán aos novos estudantes a atopar orientación académica presentándolles toda a oferta existente en materia de estudos universitarios, formación continua, capacitación profesional, aulas abertas, máster e posgraos.

Tamén recibirán propostas en idiomas e poderán consultar as ofertas das Forzas Armadas ou escolas específicas como as de cantaría, aviación, arte dramática, música ou fútbol, deporte representado pola Real Federación Galega.

Ata o venres 28 de outubro están previstas charlas de orientación académica e emprendimento, mesas redondas, actividades no Metaverso, mesas redondas, exhibicións de fotografía e maquillaxe, talleres de robótica, deseño de videoxogos, electrónica creativa e biotecnoloxía, entre outras propostas.

O conselleiro de Cultura, Educación, FP e Universidades, Román Rodríguez, participou na inauguración de Edugal, onde destacou a "calidade" do sistema educativo galego e comprometeuse a seguir impulsando accións para blindar o seu "prestixio", como, ao seu xuízo, xa se reflicte nos Orzamentos 2023 da Xunta de Galicia.

O titular de Educación do Goberno galego referiuse, en concreto, aos ensinos de Formación Profesional como "garantía de empregabilidade e de futuro" para os estudantes, aos que animou a achegarse ás casetas do nove centros educativos presentes na feira para coñecer "unha mostra moi diversa e representativa da nosa oferta de FP".

Román Rodríguez dixo sentirse "especialmente orgulloso" da evolución da FP como unha vía formativa "moi prestigiada e demandada", con ao redor de 61.000 matriculados neste curso, e que alcanza taxas de inserción laboral que superan o 92% no caso da modalidade Dual.

Nesta mensaxe incidiu tamén o presidente de Aempe, Jose María Corujo, quen puxo o foco na necesidade de "crear plans de formación para afrontar un futuro no que se van a demandar novas orientacións profesionais".

Alumnado e estudantes dun instituto /XUNTA - Arquivo / Europa Press