O carbón, a enerxía negra que desaparece en España e medra en Galicia
Aumentou un 87% para producir o 4% de electricidade. Na presente década as emisións de gases con efecto invernadoiro deberían diminuír cando menos até un 65% a respecto de 1990, case o dobre do conseguido até hoxe.
Por Galicia Confidencial | A Coruña | 14/02/2023 | Actualizada ás 14:00
A produción eléctrica con carbón medrou un 87% en Galicia durante 2022, aínda que só achegou un 4% da produción galega. Unha situación que lamenta a plataforma Galiza, Un Futuro Sen Carbón que reclama o peche total e desmantelamento da central de carbón de Endesa nas Pontes en 2023.
Con todo, a repunta na produción eléctrica con carbón en 2022 non é un regreso ao carbón. Este pasou de achegar uns 9.500-11.000 GWh/ano e un 30-40% da produción galega en 2015-2018 a menos de 900 GWh e un 4% en 2022. O uso do carbón na produción de electricidade caeu a partir de 2019 debido ao aumento do prezo do CO2 no mercado europeo de emisións.
Debido á caída da produción eléctrica con carbón e ao decrecemento económico inducido pola COVID-19, as emisións galegas de gases de invernadoiro reducíronse un 35,9% en 2020 en comparación con 1990, segundo os datos oficiais máis recentes. Con todo, a central das Pontes segue sendo o gran centro do consumo de carbón en Galicia.
AS PONTES
En setembro do ano pasado, e case tres anos despois da solicitude presentada por Endesa, o Ministerio para a Transición Ecolóxica autorizou o peche de dous dos catro grupos da central das Pontes. A día de hoxe descoñécese até cando se prolongará o peche diferido da metade da central de carbón das Pontes. "Galicia xa é o único territorio da Península Ibérica onde Endesa se ve obrigada a queimar carbón. En Galicia xerouse o 11% da electricidade producida con carbón en España durante 2022", indica esta plataforma nun comunicado.
Así, suliña que a elevada vulnerabilidade do sistema eléctrico a secas como a sufrida o ano pasado e máis o atraso na transición enerxética son causas de fondo do recuar na descarbonización do sector eléctrico galego en 2022. "Sen a acción destes factores tanto a nivel galego como peninsular, a central de carbón das Pontes xa estaría pechada e a produción dos ciclos combinados galegos non tería igualado en 2022, con prezos disparados do gas fósil, o seu máximo histórico de 2008", engade.
AUMENTO GASES INVERNADOIRO
Como consecuencia do incremento da actividade da central de carbón das Pontes e das centrais de ciclo combinado a gas fósil, as emisións de gases causantes de cambio climático asociadas á produción eléctrica galega volveron aumentar en 2022, despois de tres anos consecutivos de descensos.
Na presente década as emisións de gases de invernadoiro deberían diminuír polo menos até un 65%, obxectivo que a plataforma Galiza, Un Futuro Sen Carbón pide que asuma a futura Lei do Clima de Galicia, que está a preparar a Consellería de Medio Ambiente. "Para iso, é fundamental desfosilizar o sector eléctrico antes de 2030, o que non prevé nin a Axenda enerxética de Galicia 2030 nin a Estratexia de Cambio Climático e Enerxía 2050", apunta.
Por iso, as organizacións integrantes da Plataforma Galiza Un Futuro Sen Carbón, solicitan á Consellería de Medio Ambiente, Territorio e Vivenda, que abra un proceso amplo de participación pública para a prometida Lei do Clima de Galicia, con consultas a tódalas partes interesadas e previo á presentación do texto, pois dada a súa importancia considera insuficiente o clásico e curto período de alegacións que adoita acompañar este tipo de procesos, que ademais non se adoitan responder.
