Máis de 20 concellos rurais de Galicia cooperan no proxecto EC4RURAL para crear comunidades enerxéticas

Máis dunha vintena de concellos rurais de Galicia cooperan no marco do proxecto europeo EC4RURAL para crear comunidades enerxéticas e os seus representantes reuníronse este xoves cos socios deste proxecto. Así, os municipios participarán no programa piloto durante os 4 anos próximos, para definir modelos de comunidade enerxética adaptados a cada realidade local.

Os concellos participarán en calidade de 'colaboradores externos' e os casos de estudo son: Mazaricos, Moeche, Monterroso, Ordes, Outes, Tordoia, Vedra e Vilasantar, na provincia da Coruña; Avión, Entrimo e Muíños, na provincia de Ourense; Becerreá, Muras, Ourol, Palas de Rei, A Pobra do Brollón, Sober e O Valadouro, na provincia de Lugo; e O Rosal, Salvaterra de Miño, Silleda e Tomiño, na provincia de Pontevedra.

En setembro de 2022, a FEGAMP (socia de EC4RURAL) enviou aos 262 concellos rurais de Galicia unha invitación aberta para participar no proxecto e ser actores protagonistas na transición cara ás enerxías limpas a través de comunidades enerxéticas. Para facer ese cambio buscarase a colaboración activa de veciños e colectivos das organizacións locais, segundo explicou o coordinador de EC4RURAL e profesor da UVigo, Xavier Simón.

A previsión é que as primeiras comunidades enerxéticas estean activas en setembro de 2025, data a partir da cal os consumidores se converterán en "prosumidores", xa que ademais de consumir, poderán almacenar, compartir ou vender o excedente de enerxía xerado. Os responsables do proxecto presentaron na reunión deste xoves varios casos de éxito e abordaron a aposta pola fotovoltaica comunicaria, que supón "un aforro considerable".

"Se queremos unha transición enerxética xusta non podemos supeditala á renda persoal", apuntou Xavier Simón. A aposta pola enerxía fotovoltaica débese, sinalou, a que, a pequena escala e comparándoa coa eólica, "é moito máis competitiva, xa que o custo económico unitario de entrada é menor".

EC4RURAL é un proxecto europeo que conta cun orzamento de 1,6 millóns de euros e implementarase ao longo do período 2023-2027 en varias fases, co obxectivo de transformar as relacións entre entidades locais, rexionais e as comunidades rurais para contribuír á transición cara ao consumo consciente de enerxía limpa, garantindo que as zonas rurais non queden atrás nun cambio de modelo imprescindible no actual escenario climático.

A Universidade de Vigo lidera este consorcio multidisciplinar integrado por outro nove entidades de España, Bélxica e Estonia. En España tamén participan a Federación Galega de Municipios e Provincias (FEGAMP), a cooperativa Sapiens Enerxía, Unión Espazocoop de Cooperativas Galegas e a Fundación Juana de Veiga.