O que pode facer o voto da emigración no resultado das eleccións de Galicia
Hai un aumento do voto con respecto ás xerais do 23X. O resultado das galegas podería non coñecerse ata unha semana despois se depende da emigración. O escrutinio de sufraxios da emigración, que pode votar en urna ata este xoves, empezará o 26 de febreiro.
Por Europa Press / Redacción | SANTIAGO DE COMPOSTELA | 15/02/2024 | Actualizada ás 12:21
Os case medio millón de emigrantes que están chamados a votar nas eleccións galegas do próximo domingo teñen ata este xoves 15 de febreiro para depositar o sufraxio nas urnas habilitadas nos consultados. E o sábado, 17 de febreiro, será o último día para a remisión do voto por correo dos residentes ausentes. Pero o seu voto pode ser decisivo nuns comicios que se prevén moi apertados como xa aconteceu cando Manuel Fraga perdeu a maioría absoluta en 2005.
A diáspora ten un peso significativo ante o 18F, tendo en conta que os 476.514 residentes ausentes con dereito a voto nesta cita supoñen case o 17,7% do censo de 2.693.624 chamados a emitir o seu sufraxio o domingo que vén. Por iso, ante un resultado axustado, o seu papel podería ser clave.
Segundo recolle o calendario electoral oficial dos comicios, publicado na web da Xunta Electoral de Galicia, o escrutinio dos votos dos residentes ausentes empezará o luns 26 e deberá estar finalizado como moi tarde o xoves 29 de febreiro. Constatado o volume ante unha nova cita coas urnas, a segunda sen voto rogado tras os comicios xerais de xullo de 2023, os partidos esperan expectantes comprobar o grao de participación.
Entre tanto, á marxe do volume que en si mesmo representa o voto emigrante, o censo de residentes ausentes (CERA) definitivo para o 18F, que publica o Instituto Nacional de Estatística (INE), reflicte tamén un incremento dos rexistrados en relación ao censo das últimas xerais --cunha alza de máis de 4.000 persoas--.
Por circunscricións, a provincia da Coruña é a que rexistra un maior número de electores CERA 164.8421; seguida de Pontevedra, con 138.182; Ourense, con 103.832; e Lugo, con 69.658.
E en canto ao 'top cinco' de países, segundo o número de potenciais electores que residen no estranxeiro, Arxentina segue á cabeza con moita diferenza, xa que computa 166.289. Séguenlle Cuba e Brasil, onde se superan os 45.000. Mentres, Uruguai computa 37.165; e Suíza, o primeiro país alleo ao continente americano no ranking, 34.114.
DO FIN DA ERA FRAGA Á MÁIS AMPLA MAIORÍA DE FEIJÓO
A CERA reflicte así o peso porcentual que teñen os residentes no exterior á hora de decidir sobre o futuro Goberno autonómico, un feito que avala unha ollada ao histórico de eleccións celebradas na Comunidade. Non en balde, cando Manuel Fraga perdeu en 2005 a maioría absoluta fiou á emigración a posibilidade de subir ata o escano 38.
O foco estaba na provincia de Pontevedra, pero o reconto do voto exterior certificou o fin da era de Fraga á fronte da Xunta. Catro anos máis tarde, en marzo de 2009, o seu sucesor, Alberto Núñez Feijóo, logrou sumar 39 dos 75 escanos da Cámara autonómica na noite electoral. Posteriormente, o voto emigrante rebaixaría a súa maioría absoluta a 38 actas, ao gañar o PSOE uno por Ourense en detrimento do PPdeG.
Ao agora líder do PP, en cambio, nas autonómicas de xullo de 2020, as últimas ás que se presentou en Galicia, o apoio dos emigrantes permitiulle o seu máis ampla maioría absoluta ao chegar ás 42 actas no hemiciclo galego --o reconto do sufraxio na diáspora inclinou esta vez a balanza ao seu favor ao arrebatar un escano ao PSdeG en Pontevedra, que sumou o PPdeG--.
