Os galegos dedicaron 33 de cada 100 euros do seu soldo bruto ao pago do aluguer en 2023
O prezo do aluguer sobe un 3,87 % en abril en Galicia.
Por Europa Press / Redacción | Santiago de Compostela | 13/05/2024 | Actualizada ás 13:35
Os galegos dedicaron unha media do 33 % do seu soldo bruto ao pago do aluguer da súa vivenda en 2023, fronte ao 32 % que destinaban en 2022, segundo un estudo do portal inmobiliario Fotocasa baseado nos datos dos soldos medios das ofertas de emprego de InfoJobs. En concreto, o ano pasado o prezo medio da vivenda de aluguer en Galicia pechou cun incremento anual do 8,4 %, ata 8,63 euros o metro cadrado ao mes. Isto supón que, tendo en conta que o salario bruto medio de Galicia foi de 2.089 euros ao mes (12 pagas), os galegos tiveron que dedicar un 33 % do soldo a pagar unha vivenda de 80 metros, a porcentaxe máis alta dos últimos cinco anos".
A nivel nacional, os españois dedicaron unha media do 43 % do seu soldo bruto ao pago do aluguer da súa vivenda en 2023, fronte ao 41 % que dedicaban en 2022, tamén a porcentaxe máis alta dos últimos cinco anos. O prezo da vivenda en aluguer en España pechou 2023 cun incremento anual do 5,7 % e situou o prezo en decembro en 11,66 euros o metro cadrado ao mes. Así, tomando o salario bruto medio de España rexistrado por InfoJobs como referencia, que en 2023 era de 26.245 euros (2.187 euros brutos mensuais se o dividimos en 12 pagas), os españois tiveron que dedicar un 43 % do soldo ao pago dunha vivenda de 80 metros cadrados en aluguer, a porcentaxe máis alta dos últimos cinco anos.
Esta cifra do 43 % está moi por encima do recomendado polos organismos de control europeos, que establecen que non se debe destinar máis do 30 % do soldo ao pago da vivenda, explica a directora de estudos e portavoz de Fotocasa, María Matos. "Practicamente en toda España, excepto en dúas comunidades, o desembolso para facer fronte ao aluguer está en niveis prexudiciais", engadiu.
Do seu lado, a directora de comunicación e estudos de InfoJobs, Mónica Pérez, destacou o repunte da inflación nos dous últimos exercicios. "Sobre todo en 2022, que diminuíu o poder adquisitivo e segue marcando as condicións de vida das persoas traballadoras", precisou. Por rexións, en 13 comunidades autónomas incrementouse o diñeiro destinado a pagar o aluguer no último ano, mentres que, en dúas delas, a porcentaxe diminuíu.
EN BALEARES DESTÍNASE MÁIS DO 60 %
En Baleares, unha das comunidades que destina a maior porcentaxe do seu soldo ao pago do aluguer, pasouse de destinar o 52 % do soldo bruto en 2022 ao 63 % en 2023. Así, o ranking das comunidades autónomas que dedican máis diñeiro dos seus soldos a pagar o aluguer dunha vivenda de 80 metros cadrados lidérao Baleares (o 63 % do soldo bruto), seguida de Madrid (62 %), Cataluña (58 %), País Vasco (54 %) e Canarias (51 %). Por baixo do 50 % atópanse Comunitat Valenciana (44 %), Cantabria (42 %), Navarra (40 %), Andalucía (36 %), Aragón (35 %), Castela e León (34 %), Galicia (33 %), Asturias (32 %), A Rioxa (30 %), Rexión de Murcia (30 %), Castela-A Mancha (25 %) e Estremadura (23 %), que pechan a táboa.
O ranking das dez provincias que dedican máis soldo ao pago do aluguer por unha vivenda de 80 metros cadrados encabézao Barcelona (65 % do soldo bruto), seguida de Illas Baleares (63 %), Madrid (62 %), Guipúzcoa (60 %), As Palmas (53 %), Biscaia (52 %), Valencia (50 %), Santa Cruz de Tenerife (50 %), Málaga (49 %) e Xirona (48 %). En cambio, as provincias que destinan menos soldo bruto ao pago da vivenda en aluguer son Cidade Real (19 %), Xaén (21 %), Cáceres (21 %), Ourense (23 %), Albacete (23 %), Badaxoz (23 %), Córdoba (25 %), Teruel (26 %), Lugo (26 %), Almería (27 %), Castelló (28 %), Palencia (29 %), Lleida (29 %), Murcia (30 %), León (30 %) e A Rioxa (30 %).
PREZO DO ALUGUER
Por outra banda, a web pisos.com asegura que o prezo do aluguer subiu un 3,87 % en abril en Galicia, se se compara co mesmo mes de 2023, ata os 5,63 euros o metro cadrado, segundo un estudo elaborado por pisos.com. A nivel nacional, o prezo da vivenda do aluguer en España subiu en abril un 7,64 % con respecto a abril do ano pasado, ata os 11,55 euros por metro cadrado, o que supuxo un repunte de case un punto porcentual durante os últimos 30 días, segundo datos difundidos este luns polo portal inmobiliario pisos.com.
Fronte a marzo, os maiores ascensos producíronse en Canarias, Cantabria e Navarra, mentres que os únicos axustes rexistráronse en Aragón e Estremadura. Interanualmente, as rexións que máis creceron foron Canarias, Comunidade Valenciana e Cantabria. Encabezaron os descensos en solitario A Rioxa, País Vasco e Navarra. Con todo, as autonomías máis caras para vivir de aluguer foron as Illas Baleares (17,82 euros o metro cadrado), Madrid (16,52 euros) e Cataluña (13,32 euros), todas por encima da media; seguidas de Canarias e Euskadi, mentres que as máis baratas seguiron sendo A Rioxa (4,45 euros o metro cadrado), Castela e León (4,96 euros) e Estremadura (5,26 euros).
As únicas provincias que creceron máis dun 3 % mensual foron Xirona e Barcelona. Teruel, Huesca e Lleida superaron o 2,5 % de recorte. Fronte a abril de 2023, catro provincias creceron máis dun 20 %: Valencia, As Palmas, Santa Cruz de Tenerife e Alacante. Xirona foi a única capital que superou o 3 % de incremento. En canto ás baixadas, as máis representativas tiveron lugar en Bilbao e Ávila, que baixaron máis aló do 2,6 %. Dun ano a outro, cinco capitais excederon o 20 % de repunte. Barcelona, Madrid, Donostia-San Sebastián, Palma e Valencia foron as capitais máis caras para vivir de aluguer.
OS PROBLEMAS DO MERCADO INMOBILIARIO
"Os problemas de accesibilidade a unha vivenda de aluguer están totalmente enquistados", sinalou o director de Estudos de pisos.com, Ferran Font quen considera que, nestes momentos, o mercado "non ten capacidade para responder á demanda" condicionada por unha oferta que se foi reducindo durante os últimos anos.
A tensión que está experimentado esta fórmula é tal que "os incrementos xa non se limitan ás principais capitais de provincia, senón que alugar agora unha casa é máis caro que hai un ano en practicamente toda España", corroborou. Con respecto ás medidas de regularización sobre o mercado inmobiliario propiciadas polo Goberno central e algunhas comunidades autónomas como Cataluña, Font cre que esta "énfase por intervir propiciou que moitos propietarios decidan retirar os seus pisos".
