A CIG convocará mobilizacións contra a "conxelación salarial" a funcionarios nos orzamentos da Xunta e do Estado

A CIG-Administración convocará mobilizacións contra a "conxelación salarial" a traballadores da administración nos orzamentos de Xunta e Estado para 2025. O sindicato censura que "aumenta a perda de poder adquisitivo do persoal empregado público" mentres "non se derroga a lexislación que impuxo os recortes".

O secretario nacional de CIG-Administración, Luís Carballo, esixe un novo acordo que "deteña esta perda, que entre os anos 2010 e 2022 foi do 18,6 %", co que se permitirá "recuperar realmente os dereitos arrebatados a persoal da administración pública". Reclama un incremento do 5 % para 2025, ademais de "unha cláusula de garantía salarial ligada ao IPC e blindada por lei", que debe ir ligada a acordos salariais anuais e plurianuais para evitar a conxelación salarial.

O sindicato nacionalista critica que "todos os acordos ratificados ata o de agora son froito de diálogo social entre os sucesivos gobernos, CC.OO., UGT e CSIF saltándose o ámbito de negociación legalmente recoñecido e onde, ademais da CIG, tamén está ELA". Xunto a isto, a CIG demanda unha xornada laboral que baixe a 35 horas en 2025 e 32 horas en 2026, así como a creación dunha mesa xeral de negociación da Administración Xeral do Estado en Galicia, ademais da eliminación da taxa de reposición.

RESCATE AUTOVÍAS

Por outra banda, CIG-Construción esixiu a subrogación de todo o persoal das concesionarias das catro autovías galegas que serán rescatadas pola Xunta ante a "preocupación máxima" existente entre os traballadores. O sindicato lamenta que non foi recibido pola administración a pesar da petición de reunión polo rescate das autovías do Salnés, Barbanza, Ourense-Celanova e Santiago-Brión. En cambio, mantiveron un encontro por este motivo co Grupo Parlamentario do BNG.

A CIG convocará mobilizacións contra a 'conxelación salarial' a funcionarios nos orzamentos de Xunta e Estado | Fonte: CIG