A Xunta activa 51 dereitos mineiros caducados na procura de novas explotacións de minerais raros

Cobre, wolframino, tántalo, litio ou coltán. A Xunta quere converter Galicia nun novo paraíso para as empresas mineiras especializada en minerais raros, tan cotizados, agora, no mundo. A súa intención é activar aqueles dereitos mineiros caducados e non explotados. En total, 51 deles por todo o territorio galego.

Un anuncio que podería avivar en Galicia un novo "El Dorado" para as empresas de minaría. Actualmente, son 200 os dereitos minieiros caducalos. A Xunta sacará a concurso 51 deles para que as mineiras interesadas puxen por eles para a súa explotación. "Se son rendibles poderán entón solicitar a explotación dese dereito mineiro", indicou o presidente galego.

Se hai varias solicitudes sobre un mesmo dereito mineiro, a Xunta aplicará a nova lei aprobada sobre a explotación dos recursos naturais que recolle que o 40% do baremo terá que ver co cumprimento de criterios sociais, ambientais e económicos no lugar onde se implanten.

200 DEREITOS CADUCADOS

A Xunta anunciara xa a realización dun estudo, dentro do Plan do desenvolvemento dos dereitos mineiros de Galicia, no que se detectaron 200 casos de dereitos mineiros caducados. Galicia é líder na produción de varios minerais e conta co único xacemento coñecido en Europa de coltán, chamado ouro negro polo seu uso na produción de aparellos tecnolóxicos. É o de Penouta, en Viana do Bolo, que se atopa paralizado por orde xudicial debido aos riscos para o medio ambiente.

Este anuncio chega tras varios reveses para o Goberno galego, que lle retirou o permiso de vertedura á polémica mina de San Fins e afronta decisións xudiciais como a do Tribunal Superior de Xustiza de Galicia de anular o plan ambiental da de Casalonga ou de suspender preventivamente a actividade na de Penouta.