Máis de 12 millóns de euros do fondo ambiental serán abonados polo Goberno galego aos concellos este mes
O obxectivo é que realicen actuacións de prevención, reutilización e reciclaxe de residuos.
Por Europa Press / Redacción | SANTIAGO DE COMPOSTELA | 17/03/2025 | Actualizada ás 19:03
A Xunta abonará máis de 12 millóns de euros aos concellos galegos durante este mes do fondo ambiental para que realicen actuacións de prevención, reutilización e reciclaxe de residuos. O acordo recibiu o visto e prace do Executivo galego na súa reunión semanal, celebrada este luns e onde o conselleiro de Facenda, Miguel Corgos, presentou a iniciativa, contemplada nos orzamentos da Xunta de 2025.
En concreto, o Fondo de Cooperación Local repartirá máis de 5 millóns de euros para a provincia da Coruña, 4,2 millóns a Pontevedra, 1,5 millóns de euros a Lugo e 1,3 a Ourense. Os orzamentos de 2025 recollen un incremento de case 10 millóns de euros no Fondo de Cooperación Local en comparación cos do ano pasado, ata alcanzar os 168 millóns de euros. Unha das novidades é a inclusión dunha partida de 5,4 millóns para os concellos de máis de 15.000 habitantes, porque, como resalta a Xunta, son os que "menos ingresos teñen" e, por tanto, teñen máis dependencia das transferencias doutras administracións.
