Os tres candidatos a presidir o TSXG apostan por atallar a sobrecarga, non revictimizar e reivindicar a primeira instancia
Alañón, Fraga e Picatoste comparecen 'en liña' ante o CGPJ con discursos nos que estivo moi presente a nova reforma legal da xustiza.
Por Europa Press / Redacción | SANTIAGO DE COMPOSTELA | 20/03/2025 | Actualizada ás 14:36
Os tres maxistrados candidatos a presidir o Tribunal Superior de Xustiza de Galicia (TSXG), Fernando Alañón Olmedo, Antonio Fraga Mandián e Ignacio Alfredo Picatoste Sueiras, presentaron este xoves as súas respectivas candidaturas ante o Consello Xeral do Poder Xudicial (CGPJ). Os aspirantes suceder a José María Gómez e Díaz-Castroverde, que decidiu non presentarse á reelección, ofreceron senllos discursos de maneira telemática nos que prometeron atallar a sobrecarga de traballo dos xulgados galegos; evitar a revictimización de colectivos desfavorecidos, especialmente mulleres que sofren violencia de xénero; e, mesmo, se reivindicou o labor da primeira instancia de cara á entrada en vigor, en abril, da Lei Orgánica 1/2025, que reforma a organización do Poder Xudicial.
O primeiro en facer a súa comparecencia 'en liña' foi Fernando Alañón Olmedo, maxistrado da Sala do Civil e Penal do alto tribunal galego. Reivindicou a súa traxectoria con prazas "en tres das catro provincias" de Galicia e como docente para a Universidade de Vigo e a UNED. Aínda que definiu a situación da xustiza en Galicia como "satisfactoria, en termos xerais", si apuntou como materias pendentes a "preocupante" sobrecarga de traballo que afrontan moitos órganos de primeira instancia na Comunidade. De feito, mencionou que hai tres xulgados da Coruña que "superan o 200 %" de capacidade de traballo.
Así, avoga por ter estes datos en conta á hora de desenvolver a O 1/2025 en Galicia, que suporá un "cambio de paradigma" coa creación dos tribunais de primeira instancia en substitución dos actuais xulgados homónimos. Neste contexto, Alañón tamén aposta pola "comarcalización" dos xulgados de violencia contra a muller e contra a infancia. Ademais, apelou directamente á Xunta para que dote ao sistema xudicial galego de "medios adecuados para a solución de controversias" pola vía extraxudicial e para que reforme a lei do recurso de casación do Dereito Civil de Galicia, co obxectivo de "evitar a súa fosilización".
FRAGA MANDIÁN, MAXISTRADO DE "PRIMEIRA LIÑA"
O segundo en realizar a súa comparecencia telemática foi Antonio Fraga Mandián, maxistrado titular do Xulgado de Primeira Instancia número 8 da Coruña, por cuxo desempeño recibiu en 2015 unha carta de felicitación do expresidente do CGPJ Carlos Lesmes. De entre os tres candidatos, Fraga foi o único ao que tiveron que advertir pola duración do seu discurso e presentouse como un perfil máis diferente, ao reivindicar a súa traxectoria desde a "primeira liña". Aínda que tivo "numerosas oportunidades" de ascender por escalafón cara a órganos colexiados (tribunais), sempre se mantivo nos unipersonais, onde non se traballa "nin mellor, nin peor", pero si "de modo diferente, de principio a fin" de cada proceso.
Leva máis de 37 anos de "exercicio ininterrompido da xurisdición", 34 deles na orde civil, coa única excepción de "dúas baixas de curta duración", segundo el mesmo destacou. Tivo praza en Vilagarcía no "punto álxido" do narcotráfico na zona e pensa exercer "ata que Deus queira". Fraga sacou peito da súa "experiencia e coñecemento suficiente" dos xulgados de primeira instancia para liderar a "nova implantación" dos novos tribunais que trae consigo a Lei Orgánica 1/2025. Tamén mencionou os seus case 170 artigos doctrinais publicados e a súa condición de xuíz decano da Coruña entre 1999 e 2012.
PICATOSTE SUEIRA: UNHA XUSTIZA QUE "NON SEXA HOSTIL"
O terceiro e último foi Ignacio Alfredo Picatoste Sueiras, actual presidente da Audiencia Provincial da Coruña. "Parto dunha premisa: o presidente do TSXG ten que ter un coñecemento da situación de todos os órganos do territorio, os máis próximos e os máis afastados", asegurou. Máis aló de mencionar a súa "colaboración" en asuntos organizativos do CGPJ, --o centro de documentación coñecido como 'Cendoj' e a dirección de cursos de formación--, destacou a súa experiencia na Sala de Goberno do Tribunal Superior de Xustiza e a súa contribución ao "mellor funcionamento" da Sala do Penal.
Picatoste foi o único en facer referencia ás constantes reclamacións de creación de novos órganos que o TSXG cursou desde 2014. Neste sentido, reclamou a habilitación de xulgados de violencia de xénero. Así mesmo, fixo referencia á "sobrecarga" da orde civil en Galicia --incrementouse un 21,5 % no último ano-- e prometeu mellorar a transparencia da xustiza, impulsar a súa modernización e que sexa "non hostil" e evite "situacións de revictimización".
