Xa son 47 os municipios en alerta máxima tras sumar Sada e Lalín
Poio, Vimianzo, Barbadás, Verín baixan ó nivel laranxa. Mantéñense as 7 cidades.
Por Europa Press / Redacción | CORUÑA, A | 04/11/2020 | Actualizada ás 11:39
Os municipios galegos en alerta vermella pola incidencia da Covid-19 baixaron este mércores a 47, dous menos que a xornada do martes, día no que tamén se rexistrou un descenso tras varios días de constante subida. Nesta xornada incorpóranse a este nivel Sada e Lalín.
En concreto, na provincia coruñesa Vimianzo pasa do nivel tres ao dous, ao que se incorporan Cedeira, Neda e Noia e do que saen Ares, Arzúa e Porto do Son. En Pontevedra, Lalín incorpórase á alerta vermella, mentres que Poio baixa ao nivel laranxa. En Lugo, non se rexistran cambios, mentres que en Ourense descenden ao nivel laranxa Barbadás e Verín.
De acordo co mapa 'semáforo' que actualiza diariamente a Consellería de Sanidade, a gran maioría de concellos en situación 3 pola pandemia están situados nas provincias de Pontevedra (21) e A Coruña (17), seguidas de Ourense (4) e Lugo (5).
En Pontevedra, están en alerta vermella este mércores Baiona, Cambados, Cangas, A Cañiza, O Grove, A Guarda, Lalín --pasa do dous ao tres--, Marín, Moaña, Mos, Nigrán, Pontevedra, O Porriño, Ponteareas, Redondela, Ribadumia, Salvaterra de Miño, Tomiño, Tui, Vigo e Vilagarcía de Arousa.
Na da Coruña, os municipios de Ames, Arteixo, Boqueixón, Cambre, Carballo, A Coruña, Culleredo, Fene, Ferrol, Malpica, Narón, Oleiros, Ordes, Pontedeume, Sada --pasa do dous ao tres--, Santiago e Teo. Na provincia lucense, seguen Cervo, Monforte de Lemos, Viveiro, Burela e Lugo, mentres que na de Ourense están Carballiño, Xinzo de Limia, Ourense e Ribadavia.
A entrada no nivel máximo de risco de todas estas localidades implica que se detectaron máis de 21 casos de coronavirus no últimos sete días. Con todo, nas urbes de máis de 50.000 habitantes, o limiar para detectar o aviso vai en función do tamaño: Ferrol --máis de 76 casos nunha semana--, Pontevedra --máis de 96--, Santiago --máis de 112--, Lugo --máis de 112--, Ourense --máis de 120--, A Coruña --máis de 276-- e Vigo --máis de 332--.
ALERTA LARANXA
Mentres, en situación dúas --na cor laranxa do mapa-- sitúanse 18 municipios, dous menos que na xornada do martes. Na provincia da Coruña son os de Betanzos, Cerceda, Santa Comba, Valdoviño, Vimianzo, Cedeira, Neda e Noia.
Na de Lugo, incorpórase a este nivel Palas de Rei e mantense Bóveda, mentres que en Ourense figuran Barbadás e Verín, que pasan da alerta vermella á laranxa. No caso de Pontevedra, están A Estrada, Gondomar, Sanxenxo, Silleda, Vilaboa e Poio, que pasa do tres ao dous.
