Xantar: xornada centrada nos Camiños a Santiago, a provincia de Lugo e Portugal

Xantar puxo a súa atención este pasado sábado na provincia de Lugo, concretamente nos concellos de Burela e A Veiga. O alcalde de Burela, Alfredo Chairos, presumiu de contar cun dos grandes portos pesqueiros de Galicia ao que chega ao famoso bonito deste concello, protagonista da súa festa gastronómica máis popular, e do que ofreceron unha degustación. Pola súa banda, o alcalde da Veiga, Juan Anta, agradeceu a oportunidade que citas como Xantar dan aos pequenos concellos. Na Veiga sitúase Pena Trevinca, o punto máis alto de Galicia, e un dos mellores lugares do mundo para ver as estrelas mentres se pode degustar un excelente mel de montaña, a “faba loba” ou a carne de caza.

E tamén o fixo nas cámaras municipais portuguesas de Esposende, Felgueiras e Vizela. Esta última acode cada ano a Xantar para promocionar o seu produto gastronómico estrela, o “bolinhol”, e o seu termalismo e a súa contorna natural. Esposende e Felgueiras. Á tradicional cooperación transfronteiriza con Portugal uniuse a provincia de Zamora que tamén tivo o seu día dedicado e que contou coa participación do presidente da Deputación provincial, Franciso José Requejo. 

DÍA DEDICADO AOS CAMIÑOS A SANTIAGO

O acto central do sábado foi un reflexo do que é Xantar, un espazo onde todo o mundo suma e no que destinos enogastronómicos de excelencia, aproveitan a súa presenza para promocionarse ante o viaxeiro de proximidade xa que estes destinos comparten en moitas ocasións recursos patrimoniais, enoturísticos e naturais dada a súa condición de ser destinos transfronteirizos. Todas estas entidades apostan por Xantar desde hai anos xa que saben que nesta cita poden atopar o tipo de turista que necesitan: o turista de proximidade apaixonado pola gastronomía, a natureza e o patrimonio, atractivos aos que en anos como este súmanse os distintos Camiños a Santiago.

Nun acto presidido polo delegado territorial da Xunta de Galicia en Ourense e presidente do Comité executivo de Expourense, Gabriel Alén, o día dedicado aos camiños de Santiago contou coa participación do Director de Administración e Relacións coas Asociacións de Amigos do Camiño de Santiago e de Xestión do Plan Xacobeo da Xunta de Galicia, Ildefonso de la Campa, quen falou dos excelentes resultados obtidos polo Ano Santo Xacobeo que atraería a finais deste 2022 a ao redor de 600.000 peregrinos. Tamén felicitou aos camiños de Santiago portugueses indicando que son os que máis creceron nos últimos anos supoñendo xa a orixe do 21% dos peregrinos que chegan a Compostela. De la Campa tamén falou do papel vertebrador dos distintos camiños que contribúen a dinamizar o desenvolvemento dos territorios que atravesan e que están na contorna rural. Relacionada co Camiño de Santiago estivo tamén a participación do Municipio de Esposende, parada do Camiño Portugués da Costa, e o de Felgueiras, atravesado polo “Caminho das Torres”.

PREMIOS XANTAR INTERNACIONAL 2022

Durante este acto central foron entregados tamén os Premios Xantar Internacional 2022 que naceron cando o salón obtivo o seu Selo de Internacionalidade (en 2014) e que contribúen a recoñecer iniciativas públicas ou privadas que destaquen pola súa posta en valor da gastronomía e o turismo, desde unha perspectiva innovadora. Foron os seguintes:

Premio Mellor Caseta Restaurante: Camiño Miñoto Ribeiro. Por ofrecer un menú galego-portugués que inclúe as diferentes etapas do Camiño Miñoto Ribeiro, maridando pratos típicos do país veciño con produtos de calidade da comarca do Ribeiro como pementos e viño e por representar á perfección a promoción de lagastronomía dos camiños de Santiago que é o fío condutor desta edición.

Premio Mellor Stand: Coren. Por ser unha das grandes empresas ourensás que actúa como embaixadora da calidade da gastronomía de Galicia e unha das grandes cooperativas de España ademais dun importante xerador de riqueza no medio rural onde xeran un crecemento económico inclusivo centrado nas persoas e o territorio. Tamén por colaborar con Xantar montando unha caseta que chama a atención e sorprende ao visitante e que promociona un produto, “o xamón Selecta, o das castañas”, que combina a gandería coa produción agrícola.

Premio á Mellor Acción Promocional en Materia de Turismo: Cámara Municipal de Matosinhos. Por promocionar en Xantar a súa marca que aúna turismo e gastronomía "Matosinhos World's Best Fish" e por participar de forma activa e dinámica cunha caseta onde poder facer fotos interactivas, gozar da realidade virtual ou probar sorte na ruleta. Ademais, por organizar un completo programa de show cookings e degustacións nos que mostran os seus peixes e mariscos. E por pasarse semanas semanas promocionando e etiquetando a Xantar a través das súas redes sociais.

Premio á Mellor Actividade relacionada coa saúde e a nutrición: ANFACO-CECOPESCA. Por aproveitar Xantar como plataforma para dar a coñecer as excelentes calidades nutricionais das conservas de peixes e mariscos e o máximo aproveitamento do produto. Pola organización de varios talleres de cociña, unha cata maridaxe para profesionais e un Taller para nenos. Por ensinarnos a todos que "catar a lata" é algo variado, divertido e saudable.