O PSdeG di que son "a mellor ferramenta" para garantir o progreso social
Formoso afirma que "tempo haberá" para concretar a candidatura do PSdeG á Xunta
Por Europa Press / Redacción | SANTIAGO DE COMPOSTELA | 25/04/2023 | Actualizada ás 15:24
O secretario xeral dos socialistas galegos, Valentín González Formoso, manifestou que "tempo haberá" para falar sobre a candidatura do PSdeG á Xunta, ao ser preguntado nun acto en Lugo por esta cuestión.
Nel, dixo que acudía como presidente da Deputación da Coruña e que, por ese mesmo motivo, non quería "mesturar unhas cousas coas outras". "Xa falei claro, antes, durante e despois", insistiu, ademais de apelar a "respectar o marco institucional", en referencia ao acto deste martes.
Estas manifestacións realizounas xunto ao delegado do Goberno en Galicia, José Ramón Gómez Besteiro; a alcaldesa de Lugo, Lara Méndez, e a subdelegada do Goberno na provincia, Isabel Rodríguez. Todos eles visitaron o novo centro de servizos sociais intergeneracional de Lamas de Prado.
PRESENTE NO 97,5% DOS CONCELLOS
O secretario de Organización do PSdeG, José Manuel Lage, destacou que o PSdeG estará presente no 97,5% dos concellos galegos "defendendo un modelo de xestión que é a mellor garantía de progreso para as cidades e pobos de Galicia".
Un modelo que, engadiu, "aposta pola xustiza social, que centra na economía os seus esforzos, pero sobre todo en construír cidades e pobos para vivir despregando políticas de igualdade que poñan ás familias no centro da acción política dos concellos, apostando pola conciliación e a convivencia".
Todo iso, apuntou, a través de "políticas saudables e sendo consciente de que o PSdeG neste momento é básico, é vital e é a mellor ferramenta que teñen os cidadáns para garantir o progreso social".
O responsable de Organización dos socialistas galegos pronunciouse deste xeito despois de que o luns finalizase o prazo para presentar as listas para as eleccións municipais do 28 de maio.
A formación fixo unha valoración moi positiva do traballo realizado, xa que haberá catro candidaturas máis que no 2019, chegando a 305 dos 313 concellos galegos, así como á entidade menor de Berán, en Ourense.
Na provincia da Coruña aumentan o número de candidaturas, chegando a un total de 89 dos 93 municipios, tres máis que fai catro anos. Ademais, a renovación das cabezas de listas é dun 21%. Só non terán listas en Moeche, Curtis, Vilasantar e Boqueixón.
En Pontevedra presentaranse listas en todos os concellos salvo catro, cubrindo 57 dos 61 municipios da provincia. Quedan fose Mondariz-Balneario, Dozón, Arbo e Agolada. Neste caso, o 20% das candidaturas presenta unha novo cabeza de lista en relación co 2019.
Pola súa banda, Lugo e Ourense contarán cunha candidatura socialista en todos os seus municipios. Na provincia lugesa, nos 67 concellos haberá un candidato do PSdeG, do mesmo xeito que fai catro anos, cun 37% de renovación. Ademais, na de Ourense, os 92 municipios terán lista socialista, cunha renovación de alcaldables, xa que máis da metade dos candidatos con novos (51,1%).
