Allariz presenta unha chea de actividades para gozar do verán

"Queremos que Allariz sexa o lugar onde todas as veciñas e veciños poidan gozar dun verán cheo de cultura, diversión e moita vida!", explicaba Cristina Cid, alcaldesa do Concello de Allariz acompañada por Alberto Conde, concelleiro de Cultura; María López, concelleira de Promoción Económica; e Carlos Puga, concelleiro de Deportes, na presentación da programación de verán días atrás.

En xullo, tanto veciñas e veciños como persoas visitantes poderán continuar gozando do XIV Festival Internacional de Xardíns de Allariz, que este ano ten como tema "O Xardín é unha obra de arte". Este evento estenderase a o 31 de outubro, convertendo a Allariz nun fermoso escaparate de arte floral.

PROPOSTAS PARA O MES DE XULLO

Do 11 ao 14 de xullo, celebrarase a tradicional Festa de San Bieito en diferentes espazos de Allariz, enchendo as rúas de música e ledicia. Nos vindeiros días serán presentadas as actividades programas para esta data en Allariz.

O sábado 20 de xullo, continúan os Roteiros Temáticos de Allariz, achegando ás persoas que así o desexen a descubrir "A Lingua das Bolboretas", película que foi rodada en Allariz en 1998, convertendo as rúas nun estudio de cine e á veciñanza en parte das protagonistas. A quedade será na Oficina de Información. Máis información en www.allariz.gal/turismo/roteiros-tematicos/.

A campaña de escavación na Cibdá de Armea 2024 desenvolverase do 15 ao 26 de xullo, e o domingo 21 de xullo, a Praza do Matadoiro acollerá o festival de danza e movemento ABANEA. A Festa da Patria celebrarase o mércores 24 de xullo nos Xardíns do Museo do Coiro cunha actuación do Cuarteto Par de Par ás 21:30h, seguida dun concerto de Os Vacaloura á medianoite.

AXENDA PARA AGOSTO

En agosto, a diversión continúa co espectáculo "Marta Sempre Arriba: Hoxe Si!!!" o venres 2 ás 20:30h na Praza do Matadoiro. O sábado 3 de agosto, O Mato será o escenario da Fornada no Mato, acompañada pola música de De Pé Feito.

Do 5 ao 8 de agosto, o Campo da Barreira acollerá as previas do Campionato de Billarda- Senior, culminando coa final o mércores 14 de agosto ás 19:00h. Previo a esta final, durante a mañá do 14 será o Campionato de Billarda-Infantil ás 11:00h.

O sábado 10 de agosto, outro Roteiro Temático guiará ás participantes pola historia de Romasanta e os días 17 e 18 será a Festa da Empanada con actividades en varios lugares da vila.

Este mes tamén haberá 2 importantes eventos deportivos: o Tríatlon Vila de Allariz --17 de agosto--  e a Regata Provincial de Piragüismo o 18 no Embarcadoiro da Alameda. ás 18:00h. Como remate a este evento haberá un concerto de Brincadelia Troupe ás 22:00h nos Xardíns do Museo do Coiro, e unha discomóbil ás 23:30 h.

FESTIVAL RIR, ARTE DE MAN E FEIRA DE PRODUTOS APÍCOLAS

O verán pecharase en setembro co RIR --Festival Internacional de Curtas de Comedia--, que terá lugar do 1 ao 7 de setembro en diferentes espazos de Allariz. O evento, que chega este ano á sétima edición, xa conta co cartel anunciador, unha obra de Alba Santa, e presentará o programa completo o 31 de xullo.

O domingo 8 de setembro chega o tradicional Mercado de Artesanía Arte de Man, un evento consolidado que xunta na vila a artesáns de toda Galicia enchendo as rúas de creatividade. E despois da artesanía, chega o momento da aplicultura coa Feira dos Produtos Apícolas --14 setembro--. Ese mesmo día está programado un novo Roteiro Temático, nesta ocasión referido ás "Personaxes Senlleiras" de Allariz.