Medio Rural pide ao Goberno a repartición de fondos para as axudas contra a enfermidade hemorráxica epizoótica

A conselleira do Medio Rural, María José Gómez, pediu ao Goberno central que reparta os 15 millóns de euros comprometidos para poder lanzar as axudas contra a enfermidade hemorráxica epizoótica.

Nunha entrevista en Radio Nacional recollida por Europa Press, lembrou que na primeira conferencia sectorial co ministro de Agricultura, Pesca e Alimentación, Luís Planas, a conselleira expuxo a "posibilidade de desenvolver unha vacina" contra esta enfermidade e habilitar axudas.

Ante isto, continuou, o Ministerio dixo "que non" xa que "non era unha enfermidade en erradicación". "Despois cambiaron de idea e anunciou esa repartición ás comunidades autónomas de 15 millóns de euros que debemos cofinanciar ao 50% de fondo propio das comunidades", detallou. Actualmente, "están á espera" de que leve a cabo esa repartición para saber canto lle pertence a cada comunidade e, a partir de aí, poder sacar a correspondente orde de axudas.

"Esa orde de axudas é imprescindible sacala, pero estamos xa a final de ano, de ano administrativo. Primeiro temos que saber de canto diñeiro imos dispor para sacar a liña de axudas e despois executala", esgrimiu.

Con todo, se ese decreto "tarda en saír", logo a Xunta "terá problemas" para sacar esa liña de axudas, asegurou. De todos os xeitos, a prestación será con efecto retroactivo e espera que "chegue canto antes".

DESTILACIÓN DE CRISE NAS ADEGAS

Noutra orde de asuntos, consultada sobre os excedentes de viño acumulados desde pandemia na Ribeira Sacra, a conselleira explicou que as condicións da destilación de crise aprobada "non convencen" ás diferentes Denominacións de Orixe (DO) e ás adegas.

Por iso, proximamente, anunciarán diferentes as medidas que o Executivo galego "pode achegar" para dar "un pouco de osíxeno" a este sector.

PREZO DO LEITE

Cuestionada sobre a baixada do prezo do leite aos produtores galegos, remarcou que a Consellería "non pode intervir" nin prezos nin mercados e asegurou que estivo en diálogo con "todo o sector" desde produtores ás empresas de distribución.

"Estivemos ese diálogo, hai industrias que non baixaron nada o prezo do leite, ás que agradecemos inmensamente ese compromiso, hai outras que neste tempo, no verán no que sempre baixa un pouco historicamente, pois o fixeron co compromiso de subilo en setembro", asegurou.

En canto ás últimas noticias sobre que se os gandeiros galegos estivesen en Asturias venderían o leite a un prezo diferente, a conselleira apuntou que Galicia produce o "24% de leite de España" e vai en "ascenso", mentres que no resto das comunidades "descenden as producións".

"Evidentemente, somos os referentes de todas as industrias. Vese como as industrias están a apostar por investir e agrandar esas instalacións que teñen en Galicia", recalou a titular de Medio Rural.

INCENDIOS

En canto aos incendios, a conselleira apuntou que, de momento, salvo os últimos incendios, están "bastante controlados" a diferenza doutros anos.

Para "manter baixo control" os incendios, continuou María José Gómez, a Xunta, xunto a outras administracións, "fai todo o posible", pero a climatoloxía "é un factor moi importante.

"Hai moitos factores externos, non controlables, que poden incidir positivamente ou negativamente no desenvolvimiento dun incendio. Evidentemente, pois a rápida detección é a mellor arma", remarcou a titular de Medio Rural.

Con todo, lembrou á poboación que as queimas, por moi pequenas que sexa, pódense escapar e incidiu en que "están totalmente prohibidas". Ademais, pediu colaboración cidadá e calquera persoa que vexa un lume que chame ao 085 ou ao 112 para dar o aviso o máis pronto posible.

Varias vacas nunha gandaría de lácteo | Fonte: Carlos Castro - Arquivo