A Xunta non acepta a proposta de xestión do litoral do Goberno central porque "limita" consesións urbanísticas
Rueda reitera os seus argumentos: ese plan "limita" a capacidade autonómica para outorgar concesións e mantén a "inxerencia" estatal.
Por Europa Press / Redacción | SANTIAGO DE COMPOSTELA | 14/10/2024 | Actualizada ás 17:27
O presidente da Xunta, Alfonso Rueda, avanzou que a Xunta trasladará "de inmediato" ao Goberno central o seu desacordo coa proposta recibida para empezar a negociar a transferencia ao país das funcións, servizos e medios necesarios para asumir a xestión completa do litoral, ao entender que "limita" a súa capacidade de acción e mantén inxerencias estatais sobre as súas competencias.
"O noso obxectivo é chegar a un acordo no menor tempo posible, despois dos meses de espera tras a sentenza do Constitucional", esgrimiu o presidente galego, quen reiterou o rexeitamento da Xunta ao borrador, aínda que concedeu que se trata dun documento inicial.
Unha semana despois de que o Ministerio de Política Territorial enviase un borrador de acordo para o traspaso, o Consello da Xunta estudou este luns un informe no que se chega á conclusión de que a Xunta non pode aceptar unha proposta que "ignora" o novo escenario aberto tras a aprobación da Lei de ordenación e xestión integrada do litoral de Galicia (Loxilga) e a sentenza do Tribunal Constitucional (TC) que avalou en abril a súa lexitimidade.
Ademais de rexeitar a propia forma do acordo, xa que se trata dun borrador tipo de carácter xurídico, os principais puntos de discrepancia están no seu contido. En concreto, segundo remarcou Rueda, "o Estado propón reservar para si a xestión dalgúns títulos de ocupación", sen especificar cales, a pesar de que esta é unha facultade "exclusiva" da Comunidade galega, que ten as competencias en materia de ordenación do territorio.
Así mesmo, no borrador de acordo remitido proponse "a esixencia dun informe vinculante do Estado cada vez que a Xunta pretenda outorgar unha concesión para obras ou instalacións non desmontables no dominio público marítimo-terrestre (DPMT)", requisito que suporía "unha clara inxerencia estatal" sobre as competencias autonómicas.
Polo exposto e tendo en conta que o documento tampouco "concreta os medios ou o persoal que se transferiría a Galicia nin o financiamento correspondente", a Consellería de Medio Ambiente e Cambio Climático responderá este mesmo luns ao Ministerio que non acepta o borrador de acordo do traspaso en materia de ordenación e xestión do litoral.
