O cultivo de millo a gran escala aumenta as choivas en certas zonas dos Estados Unidos

O cultivo de millo a gran escala nas extensións agrícolas do Cinto de Millo de Estados Unidos, 'US Corn Belt', do que forman parte ata 13 estados do oeste e do sur do país afecta as precipitacións facendo que aumenten, segundo o estudo 'US Corn Belt enhances rexional precipitation recycling'. Do traballo, publicado esta semana na revista 'Proceedings of the National Academy of Sciences' de Estados Unidos, é coautor o profesor da Facultade de Física da Universidade de Santiago de Compostela (USC) Gonzalo Míguez Macho, xunto con especialistas de Estados Unidos e China.

"Esa zona ten un clima continental onde a estación máis chuviosa é a estación cálida, primavera-verán, que se corresponde coa de crecemento das plantas. A choiva desa época é frecuentemente en forma de treboadas convectivas, ás veces moi intensas", explicou o profesor da USC. Segundo detallou a Universidade nun comunicado, o que se descoñecía ata o momento era en que medida influían os cultivos nas precipitacións. Agora, a investigación revela que a gran cobertura de cultivos, sobre todo o millo, "fai que aumente de maneira apreciable" a evaporación e transporación e este fluxo "incrementado de vapor de auga cara á atmosfera a gran escala" tradúcese nun aumento da precipitación.

Neste sentido, detallou que "hai un crecemento" da chamada 'taxa de reciclaxe', é dicir, da parte da choiva que provén da evaporación da rexión na que cae. Por iso, o artigo sinala que o aumento da choiva é atribuído a un "significativo incremento" da proporción de reciclaxe da precipitación desde 14 a 18 %. Ese aumento "é máis forte" nun ano seco que nos anos normais e húmidos, dependendo tanto do transporte de humidade a gran escala como da evapotranspiración local.

Plantación de millo | Fonte: CSIC - UVigo