As exportacións galegas afúndense un 56% en abril, segunda maior caída do Estado

Galicia realizou exportacións en abril por valor de 772,5 millóns de euros, o que supón un afundimento do 56,2% respecto ao mesmo mes do ano anterior debido ao impacto do coronavirus, segundo os datos que publica este xoves o Instituto Galego de Estatística (IGE).

A planta viguesa do Grupo PSA retomou a produción esta semana. GRUPO PSA - Arquivo | Fonte: Europa Press

Este esborralle é o segundo maior entre comunidades, só superado por Canarias (-66,4%). O retroceso das vendas ao exterior en Galicia é 17 puntos máis elevado que a media española (-39,3%). Se en marzo a caída das exportacións galegas era do 26,7%, esa cifra duplícase en abril, nun mes no que, tal e como lembra o IGE, a situación da pandemia levou á toma de medidas como "a redución da produción e o peche de fronteiras".

Unha das cuestións que explican esta situación foi o peche temporal da planta de PSA Citroën de Vigo durante abril. E é que as vendas ao exterior de vehículos protagonizan a diminución (-88,7%), seguida do téxtil (-80,3%). No outro extremo, as conservas de carne e peixe rexistran o maior repunte neste mes de confinamento (+45%).

Por destino xeográfico, baixan as vendas a todos os países cos que habitualmente comercia Galicia: Alemaña (-68,1%), Francia (-66,5%), Italia (-60,8%) e Portugal (-52,4%).

DESCENSO ACUMULADO NO ANO

Antes da irrupción do coronavirus as exportacións galegas crecían un 8% entre xaneiro e febreiro, pero marzo rompeu con esa tendencia. De tal forma, Galicia suma dous mes con descensos interanuais.

Así, as exportacións caen un 17,7% entre xaneiro e abril na comunidade. Tamén neste caso supón a segunda peor cifra no Estado, con País Vasco á cabeza (-21,4%). É cinco puntos porcentuais maiores que a española (-12,4%).

BAIXADA DE IMPORTACIÓNS

Pola súa banda, Galicia importou bens por valor de 797 millóns de euros, un 48,1% menos, uns 11 puntos por encima da media española (-37,2%).