Científicos estudan o comportamento das baleas que visitan Galicia
O Instituto de Oceanografía realizou un estudo das baleas en aguas das Rías Baixas.
Por Galicia Confidencial | Vigo | 03/10/2024 | Actualizada ás 11:14
Persoal científico do Instituto Español de Oceanografía (IEO, CSIC) a bordo do catamarán da asociación EDMAKTUB, realizou un estudo multidisciplinar dos rorcuais (Balaenoptera physalus), que se concentran nas augas galegas para alimentarse.
O rorcual común, tamén coñecido como balea común, é unha especie de mamífero mariño da orde dos cetáceos. En tamaño, este animal é o segundo máis grande existente no planeta, tan só superado polo seu parente Balaenoptera musculus, o rorcual azul ou balea azul. Pode chegar a alcanzar unha lonxitude de 27 m.
A campaña, realizada na plataforma continental fronte ás Rías Baixas na primeira quincena de setembro, permitiu tomar mostras de auga para a caracterización xenética dos rorcuais a través do ADN ambiental. Ademais, recolléronse mostras de microbioma do tracto respiratorio mediante o uso de drones e tomáronse imaxes para a súa identificación e análise biométrico.
"A análise do ADN ambiental presente na auga e o uso de drones para a toma de datos e mostras fai posible obter unha información até agora descoñecida, o que nos permitirá caracterizar a poboación que visita as augas galegas, estudar a súa conectividade e patróns de migración, así como o seu estado de saúde", sinala Camilo Saavedra, investigador do Centro Oceanográfico de Vigo do IEO e responsable da campaña.
